Dyma hynt a helynt criw o bobol ifanc sy’n dechrau eu blwyddyn gyntaf gwyllt yn fyfyrwyr yng Ngholeg Prifysgol Cymru Aberystwyth. Dilynwn eu hanturiaethau rhywiol, meddwol a herfeiddiol o wythnos gyntaf y ‘Ffreshars’ ym Medi 1991 tan ddiwedd tymor yr haf 1992. Wrth i adar brith isfyd y dref hudol a pheryglus hon demtio’r Ffreshars i arbrofi, mae’n anodd iawn iddynt ddweud ‘na’.

LOIS Y darpar gyfreithwraig ifanc a naïf sy’n 18 oed ac o sybyrbia Sir Gâr. Mae Lois yn syrthio dros ei phen a’i chlustiau gyda Daniel ac yn profi rhamant mwya cythryblus ei bywyd. Daw hi i ddysgu’n fuan nad dim ond cwrw, rhyw a rhyddid yw bywyd Prifysgol –ond fydd hi’n medru ymdopi â’i bywyd newydd?

HYWEL Yn ddiniwed a charedig, mae Hywel yn Efeng-yl ac yn ffrind gorau i Lois o’r ysgol. Mae bywyd Prifysgol yn codi ofn arno ac mae’n teimlo’n gwbl estron nes iddo gyfarfod â Meleri, y ffreshar bach gwyllt. Ond pwy fydd e’n dewis, ei deulu ceidwadol a chrefyddol, neu ei gariad newydd cyffrous?

CERYS Jezebel rhywiol y neuadd –mae pob merch eisiau bod fel Cerys ac mae pob bachgen eisiau bod gyda Cerys. Ond pan mae’n dechrau perthynas gudd gyda Marc Arwel, y darlithydd priod a thwyllodrus –mae’n darganfod gwir beryglon serch.

MARC ARWEL Yr Angel penffordd mewn Armani –dyma’r dyn y mae’r merched oll yn ei ffansïo ond mae yna greadur sinistr y tu ôl i’r wen. Ac am y tro cyntaf yn ei fywyd, mae ei chwant tanbaid at Cerys yn bygwth ei holl fyd.

DANIEL Y ‘pin-up’ oriog a gitarydd yn y band, Annwfn. Mae digwyddiad trychinebus yng ngorffennol Daniel wedi niweidio’i gymeriad yn ddifrifol. Gall Lois, sy’n llawn serch ac ymroddiad, ei achub o ddyfnderoedd anobaith ac euogrwydd?

FFLUR Y goth gwrthryfelgar sy’n gwrthod dilyn y pac yn y Neuadd Breswyl Gymraeg. Trwy fyw am y presennol yn unig, mae’n ceisio anghofio ei gorffennol tywyll, ond a fydd hi’n arloesi’r flwyddyn gyntaf?

CAI Prif ganwr carismataidd Annwfn a chymeriad cwbl hunan-ddinistriol. Yn dalentog tu hwnt, gall e ymladd yn erbyn ei natur dinistriol a swyn y botel whisgi?